+++ Serbska centralna biblioteka Serbskego instituta jo se zajźony stwórtk zasej wobźěliła na cełonimskem dnju bibliotekow. Póbitowali su póglěd do wobstatka a źěła biblioteki, wósebnje za wuknikow +++ Dolnołužyski gólański muzej w Grodku jo dostał kwalitny zygel „Familienfreundlich im Lausitzer Seenland“, dokulaž jo se pśesegajucy wuměrił na pótrjebnosći familijow ze źiśimi. Myto jo turistiski zwězk Lausitzer Seenland e.V. pósćił +++ Lětosne europske myto za bergaŕske pšawo Sinti a Roma jo šło na George Soros. Wón jo z Hungorskeje póchadajucy amerikański pśežywjecy holocausta, kosmopolit a filantrop. Pócesćili su jogo za jogo lětźasetki dłujki angažement za towarišnostne rownostajenje Sinti a Roma. Centralna rada Sinti a Roma co z toś tym mytom widobne znamje pśeśiwo anticyganizmoju stajiś +++ Ptaškowa mrětwa se w Bramborskej dalej rozšyrijo. We wokrejsu Sprjewja-Nysa na pśikład njejo hyšći pad znaty. Weto se pórucyju pjerinarjam šćitne napšawy. Wažne jo tek, až se njedotyknu njaboge źiwe ptaški mimo šćita.