Z Lubnjowa/Lübbenau. „Cuzy ptašk“ z lěta 1911, z dańskim filmowym starom Asta Nielsen a pód režiju Urbana Gada, wopśimjejo te docełego prědne pósrědnjone filmowe wobraze kultury a žywjeńskeje wašnje Serbow, jo se mimo togo dopołnje zachował. Dla togo jo to wósebnje zajmny a drogotny znank nic jano serbskich a nimskich, ale wěsće teke mjazynarodnych filmowych stawiznow. Z prezentaciju toś togo filma jo pśišeł Serbski ludowy ansambel (SLA) slědny tyźeń wałtoru do Dolneje Łužyce. Pokazali su jen na Pisanem jawišću Lubnjow.

Daniel Kubik, cłonk serbsko-nimskeje filmoweje seśi „Łužycafilm“ a medijowy wědomnostnik, kenž se intensiwnje zaběra z temowym pólom filmow a Serbow, jo wótwórił wjacor z pśednoskom, w kótaremž jo informěrował wó stawiznach nastaśa togo filma. Nawjerśeła jo se ta tśiaktowa lubosćinska tragedija ze serbskimi grajarjami małych rolow w Błotach, we wokolinje gósćeńca Wótšowska. Wulicujo se tšojenje młodeje Englandaŕki May (grateje wót Asty Nielsen), ak drogujo z nanom do Błotow a se tam zalubujo do serbskego bura Paul.