Ze Serbskego domu/Wendisches Haus. Wót slědnego stwórtka móžomy w klubowni Serbskego domu w Chóśebuzu wiźeś nowu wustajeńcu, ako jo tak ako pśecej Lodka wugótowała. „Wšo lubosć – Alles Liebe“ se jej groni, a južo pśi jeje wótwórjenju jo se pokazało, až jo wóna něco wósebnego. Gósći ga njejsu se jano mógali woglědaś te wustajone wobraze, ale su mógali teke słuchaś na literaturu a muziku. To jo było něco kradu nowego, z takeju „kombinaciju“ wšakeje kultury njejo Lodka hyšći žednje pśi wótwórjenju jadneje wustajeńce (jich jo było dotychměst južo wušej 130!) woglědarjow pśechwatała!

We srjejźišću wustajeńce stoj ta lubosć a z njeju zwězana rědnosć cłowjeka. Monika Schubert z Lubina jo to na 25 wobrazach – za wětšy źěl su to portreje – we wšakich mólaŕskich technikach a we wšakich situacijach zapópadnuła a pśedstajiła. Něgajšna ceptaŕka za muziku ma za to wěsće to pšawe woko. Južo dlejšy cas statkujo ako licho źěłajuca wuměłcowka a awtorka, głownje za lyriku, za pisanje basnjow. Jeje prědne knigły ze swójskimi štuckami a ilustracijami su wujšli 2023.