Pó wuzwólowanju ako pśiducy prědny zastupnik krajnego raźca jo dostał Carsten Billing wjele gratulacijow. Mjazy drugim wót dr. Torsten Schühlera, pśedsedarja wokrejsnego sejma, a Haralda Altekrügera, krajnego raźca. Tomu běchu cłonki krajnego sejma ten źeń teke wutšobnje gratulěrowali k jogo 70. narodnemu dnju. Foto: Horst Adam 
Z Baršća/Forst. We wjednistwje wokrejsnego zastojnstwa Sprjewja-Nysa we Wokrejsnem domje w Baršću buźo se w pśiducem casu wšake pśeměnjaś. To se zachopijo pla něntejšnego landrota. Harald Altekrüger, źinsa 70 lět stary, ga južo 15 lět dłujko toś ten nejwažnjejšy amt we wjelikem wokrejsu Sprewja-Nysa ma, a tak jo se ten wuměńk napšawdu zasłužył. To se stanjo w prědnem kwartalu pśiducego lěta. Tak deje cłonki wokrejsnego sejma wuzwóliś nowego krajnego raźca abo nowu krajnu raźcowku. Kandidaty za to južo su, naraźone wót wšakich partajow, ako sejźe we wokrejsnem sejmje. Nanejmjenjej tśo to budu.
Teke za něntejšnego prědnego zastupnika krajnego raźca su pytali naslědnika (Nachfolger). Tu funkciju ma jano hyšći krotki cas Olaf Lalk, ako bu we februarje lěta 2019 do togo wažnego amta wuzwólony. Znowa w měrcu se pódajo na zasłužony wuměńk.
