Ze Pšynego/Missen. Z kuždym pšawom jo šulski wjednik dr. Matthias Guttke wuzwignuł, kak gjardy wón jo na šulski chor Dolnoserbskego gymnaziuma (DSG). „To jo lěbda k domyslenju, gaž słyšymy, až dajo něnto 45 wuknicow a wuknikow w šulskem chorje.“ To se wě, až jogo zawjeźeńske słowa k nazymskemu koncertoju chora DSG, njeźelu w zalu Starego gósćeńca w Pšynem, su byli pśewšo chwalece słowa – ako za tych w chorje młodych sobustatkujucych tak teke za wšyknych pódpěrarjow, ako su to zmóžnili, až se take něco pśewjeźo. Koncert, rozmjej, jo se wótměł w ramiku chorowego lěgwa. Wót 9. do 13. oktobra su chorowe cłonki w Starem gósćeńcu póbyli, aby pilnje probowali za nazymski koncert a za gódownicce w decembrje – to pód nawjedowanim wukubłanego spiwańskego a muzikaliskego specialista Gerald Šejn wót Dompro a pód organizatoriskim a pedagogiskim nawjedowanim ceptaŕki Jennifer Dünnbierowa. Pśi tom wósebnje spomnjeśa gódne jo teke to lětniki pśesegajuce gromadu-statkowanje chorowych cłonkow, wót pětego lětnika až k studiumoju. „Dajo stakim teke absolwentow šule, ako nadalej w chorje spiwaju.