Z Budyšyna/Bautzen. Pód napismomt „Mato Kosyk – Serbski Amerikanaŕ“ jo se wótměł srjodu, 24. septembra, w budyšyńskem Serbskem muzeju dalšne zarědowanje w rěźe a „Kofej w třoch“. Kurator muzeja dr. Jędrzej Soliński jo pówitał mału gjarstku gósći a jo wuzwignuł, až „toś ten format njejo na frekwencu wusměrjony. Gaž jano jaden zajmc se namakajo, my to wugótujomy“. Biografija drje nejskerjej nejwuznamnjejšego dolnoserbskego basnikarja Mato Kosyk (1853–1940) jo wón krotko zespominał a pón dał pśeglěd jogo stwóriśelskich fazow. Jich wuslědki su kradu wobšyrne – njeglědajucy na to, až pśestawki mjazy nimi su až k 15 lět trali. Jogo w Ludowem nakładnistwje wujźone „Spise“ wobpśimjeju źaseś zwězkow z dogromady jadnab 4.000 bokami. Nejwažnjejša pógóń, pjero pśimjeś, su byli pšosby mjazy drugim Bogumiła Šwjele a Arnošta Muki z cilom, Kosykowu lyriku antologiski wudawaś móc.