Gaž se nazyma do kraja pśikšadnjo, gaž to bywa wence zymnjejše a mjenjej spódobne, musymy se za to staraś, až póchmurne njebjo se njewótbarwijo na naše mysli. Něco, což na kuždy pad pomaga, aby se tomu zadorało, jo muzika! Kak derje, až dajo nazymske koncerty. A rowno na ten slědujucy koncert musymy wósebnje pokazaś, pśeto tam dožywijośo naš serbski muzikaliski dorost: Chor Dolnoserbskego gymnaziuma (DSG) pšosy njeźelu, 12. oktobra, zeger 17:00, do Starego gósćeńca we Pšynem (Missen) na nazymski koncert. Z pódpěru Załožby za serbski lud a Domowiny wugótujotej Dolnoserbska kulturna akademija a Dolnoserbski gymnazium toś ten koncert. Zastup jo dermotny, ale pósćiwanki su witane.

Organizatoriske wjeźenje chora DSG jo łoni ceptaŕka Jennifer Dünnbierowa pśewzeła. Profesionelne muzikaliske wjeźenje chora ma Gerald Šejn wót Domproo na starosći. Z nim jo se rozgranjała redaktorka Jill-F. Ketlicojc.

Luby Gerald, co jo ta slězyna, dla kótarejež móžomy 12. oktobra ten koncert w Pšynem dožywiś?