Z Města/Cottbus. Ta wót wušeje šołty pówołana źěłowa kupka „Serbske pomniki města Cottbus/Chóśebuza“ (Arbeitsgruppe „Sorbische/wendische Denkmale der Stadt Cottbus/Chóśebuz) se stara wó registrěrowanje, dokumentěrowanje a gódnośenje serbskich pomnikow a znankow kultury a žywjenja serbskego luda na terenje města Chóśebuza. Něnto jo Heike Apeltowa wót Domowiny nowy cłonk teje źěłoweje kupki a z tym jo tam naslědnica Karin Tšukoweje. Domowina jo ju naraźiła a wušy šołta Tobias Schick jo ju do togo gremiuma pówołał.

Kupka se zmakajo pó kwartalach. Pśi pósejźenju w septembrje su se cłonki wó wšakich dalšnych źěłowych śěžyšćach wuměnili. Ako prioritu wiźe zawěsćenje serbskich kulturnych znankow – wósebnje, což nastupa serbske wuměłstwo na twarjenjach. Město Chóśebuz co pśi tom swójo za wobej boka wužytne zgromadne źěło z Domowinu dalej wjasć, ga teke pśi woplěwanju serbskich pomnikow a pśi dokumentěrowanju a cesćenju znankow kultury a žywjenja serbskego luda.