Z Janšojc/Jänschwalde. Kužde lěto se žnjowny swěźeń w našej źiśowni z napnětosću wótcakujo – swěźeń, kenž tradiciju, zgromadnosć a dobru porciju wjasela zjadnośijo. Lětosa su se zgromaźili źiśi z góletkownje, źiśownje a horta, ze starjejšymi a starymi starjejšymi, aby bogate žni swěśili, ale wjedro jo měło swóje plany.

Južo do wjelikego žnjownego swěźenja 12. septembra su pśigótowanja wótběgali. Serbske drastwy su se na probu woblakli a za naše źowća se blatowali a wuropkowali. Za nejmjeńše su se małe tradicionelne kóšulki zešyli. Z dubowego lista su, z pódpěru někotarych starjejšych, žnjowne wěnce a žnjowne wrota wobwili. Na dopołdnju swěźenja su byli slědne pśigóty – blida su se rědnje dekorěrowali, žnjowne wrota a wěnce z kwětkami wupyšnili a tykańcowy bufet jo se natwarił.