Ten wjeliki lětosny highlight we tom pódpołnocnem měsćańskem źělu Chóśebuza jo był jubilej ku góźbje 725. burstaka – to se póśěgujo, se wě, na to, až jo se wjas Žylow pśed 725 lětami prědny raz dokumentariski naspomnjeła. Źinsa jo Žylow ten nejwětšy měsćański źěl Chóśebuza pó licbje wobydlarjow – jich ga jo wušej 35.000. A až dajo mjazy Žylowarjami kšutu zwězanosć, bogate towaristwowe žywjenje maju, až wóni z lubosću woplěwaju serbske tradicije a až mógu z bejnym angažementom wjeliki a wjelebocny swěźeń na nogi stajiś – to su zas raz dopokazali wót 19. do 21. septembra, ako su wóswěśili swój jubilej ku góźbje 725 lět.