Dypkownje, kak šulske źiśi, su Zorjaki tśeśego lětnika zachopili w septembrje. Ale chto su toś te nowe woblica w lětniku 2025/2026? Nagromadu 14 žeńskich a muskich woglědujo wót pónjeźelego do pětka k dwóroju Zorjow w Dešnje. Kaž wobej lětnika do togo, nawuknu wóni dolnoserbsku rěc imersiwnje.

Lětosa pak njejsu jano Zorjaki nowe, ale teke pla docentow jo se něco změniło. Hyšći pódla su Franciska Albertowa, Anka Zachariasojc a Gregor Wieczorek. Ale ze slědnego lětnika wobogaśijotej něnt dalšnej absolwenta team: Pětš Ciąźyński ako dalšny rěcny trenaŕ a Karlinka Köhlerojc ako projektowa managerka. Maksimilian Hasacki jo na prědnyma dnjoma hyšći nowych Zorjakow na městnje wuwitał, ale jo pótom rěcne gnězdo spušćił a jo do pódpołdnja lětał. Dokradnje gronjone, jo se wudał do Barcelona, aby hyšći raz studěrował.