Z Wětošowa/Vetschau. Njeźelu, 28. septembra, jo wužywało 3.753 do wuzwólowanja wopšawnjonych wobydlaŕkow a wobydlarjow móžnosć, pśi wuzwólowanju nowego šołty swój głos wótedaś. (Wobźělenje na wuzwólowanju jo z tym lažało pśi 57,3%) Dwa kandidata stej se wuzwólowanjeju stajiłej. Na kóńcu wuzwólowańskego dnja jo se wopokazał Chris Mielchen (Wählergruppe der Ortsteile) ako jasny dobyśaŕ. 86% tych płaśecych 3.693 głosow jo na njogo pśišło. Wón stakim smějo byś pśichodny šołta města Wětošow/Błota z pśisłušnymi źaseś městnymi źělami Chórice (Göritz), Kósojce (Koßwig), Łaz (Laasow), Pšyne (Missen), Njabožkojce (Naundorf), Hogrozna (Ogrosen), Raduš (Raddusch), Herpna (Repten), Tšadow (Stradow) a Zušow (Suschow). Drugi kandidat dr. Olaf Kappelt (cłonk AfD) jo dostał 14% płaśecych głosow. Tuchylny respektiwnje něgajšny šołta Bengt Kanzler (mimo partaje) njejo pó dwěma wuzwólowańskima periodami wěcej nastupił.