Z Grodka/Spremberg. Tśeśi oktober jo „Źeń nimskeje jadnoty“. A lětosa jo to južo 35. wrośenica zasejzjadnośenja Nimskeje, wjelikego tšojenja, kenž wšakorake spomnjeśa, zacuśa a naglědy wubuźijo. Wjele akcijow a zarědowanjow se zaběra z wótpowědnymi temami, wóni su sami źěl dopomnjeńskeje kultury a cesto rownocasnje wótbłyšćiju dopomnjeńsku kulturu. To pśitrjefijo teke za wustajeńcu „Aufarbeitung. Die DDR in der Erinnerungskultur“, kótaruž jo stwórtk tyźeń, 25. septembra, šołtowka Grodka Christine Herntier w grodkojskej radnicy wótwóriła. Plakatowa wustajeńca Zwězkoweje załožby k rozestajanju ze SED-diktaturu (Bundesstiftung zur Aufarbeitung der SED-Diktatur) wulicujo wó wobchaźe ze stawiznami SED-diktatury a nimskem źělenju wót 1989. Wustajeńca wopśimjejo 20 toflow, pśi comž kužda stoj pód pregnantnym motom (mjazy drugim „Offenlegung“, „Verwirrung“, „Wisch und weg“, „Bilderstreit“ abo „Osttrotz“). Pregnantne su teke te teksty wót Ulricha Mählerta a Stefana Wollego. K naglědniwosći pśinosujo 110 fotow, faksimile, statistikow a karikaturow.