Z Miłoraza/Mühlrose. Zajźony pětk, 26. septembra, jo Zwězkowe pśedsedaŕstwo (ZP) Domowiny wobradowało w Miłorazu. Županka Diana Maticowa jo rozpšawiła wó aktualnej situaciji w župje Jakub Lorenc-Zalěski. Tak ma župa tuchylu cełkownje 525 cłonkow. Župne pśedsedaŕstwo pśigótujo tuchylu 9. głownu wólbnu zgromaźinu župy, dnja 29. oktobra, w Serbskem kulturnem centrumje w Slěpem. Ako jo županka wuzwignuła, jo akceptanca serbšćiny w regionje kradu pśiběrała. Marek Krawc, wucabnik za serbšćinu Rěcnego centruma Witaj, wuwucujo tuchylu nagromadu 40 wobźělujucych w šesć kursach serbšćiny. Rěcna motiwatorka projekta ZARI Juliana Kaulfürstowa pódpěrujo ze swójimi pórucenjami zajmowanych pśi wuknjenju a nałožowanju serbšćiny. Pśiducy wjerašk buźo znowa 10. mjazynarodny festiwal dudakow wót 19. do 21. junija 2026 w Slěpem.