Z Barlinja/Berlin. Pó iniciatiwje krajow Sakska, Bramborska a Šleswig-Holštejnskeje jo Zwězkowa rada slědny tyźeń stwórtk, 26. septembra, Zwězkowe kněžaŕstwo napominała, te styri awtochtone narodne mjeńšyny a ludowe kupki Nimskeje do zakładneje kazni zapisaś. Wobzamknjenje Zwězkoweje rady, tej iniciatiwje pśigłosowaś a ju pódpěraś, jo prědny kšac do dobrego směra. Domowina ma to za „historiski a do pśichoda segajucy signal“. Něnt jo Zwězkowe kněžaŕstwo na rěźe, aby z dalšnymi kšacami doprědka góniło toś tu nastupnosć – ten wót Zwězkoweje rady pśiraźony dodank zakładneje kazni wó pšawach Serbow, nimskich Sinti a Roma, dańskeje mjeńšyny a friziskeje ludoweje kupki.