Z Města/Cottbus. Gaž běšo se 11. septembra w Měsćańskem domje w Chóśebuzu zmakał Wuběrk za wótkubłanje, kulturu, sport a serbske nastupnosći k swójomu wobradowanju, jo tam była k słyšanju teke serbska rěc. Frakcija AfD w měsćańskem parlamenśe ga běšo do togo pósłała tśi pšašanja na wušego šołtu Tobias Schick, a to w serbskej rěcy. Ana Kosacojc-Kozelowa, zagronita za serbske nastupnosći w Měsće, jo na to teke w dolnoserbskej rěcy na pósejźenju wuběrka wótegroniła, a k tomu pśidała pisny nimski pśełožk. Ako jo wóna groniła, jo to był docełego prědny raz, až su w měsćańskej zgromaźinje a w jadnom z jeje wuběrkow tak mócnje wužywali serbsku rěc.