Z Trjebina/Trebendorf. Wót aktualnych swětosnosćow w Trjebinje jo był muzikaliski swěźeń njeźelu wósebny wjerašk. Wón jo se wótměł ku góźbje 15-lětnego wobstaśa Šusteroc dwóra. Južo pśi zachoźe su zgónili te w bogatej licbje pśichwatane woglědarje, kak jo ten dwór raz nastał. Dokradnje to jo mógał tek něgajšny trjebinski šołta Peter Mäkelburg rozpšawiś. Wón jo teke raz bydlił w gmejnskem źělu Zagora (Hinterberg), jo był sused Hanza Šustera. Wobej stej se znałej wjele lět. „Hanzo Šuster jo był górnik, jo był informěrowany wó brunicowych planach a jo wěźeł, až jaden źeń Zagora pód bager pśiźo. Jogo bydleński chrom z pjacom jo se pśed něźi 200 lětami mimo gózdźa a cementa natwarił, a tak jo nastała ideja, jen pśestajiś a wobchowaś, južo k casoju jogo žywjenja“, dopomina se Peter Mäkelburg. Vattenfall jo pódpěrał ten plan. 2008/09 jo se chrom pó fachojsku slědk twarił a w zelenej srjejźi Trjebina jo se wón zasej natwarił, k tomu teke brožnja. Dnja 29. maja 2010 jo se kluc swětosnje pśepódał na trjebinsku Domowinsku kupku z póstajenim, ten dwór z nowym žywjenim połniś.