Ze Złego Komorowa/Senftenberg. Na 9. njeźeli pó swětej tšojosći, dnja 17. awgusta, su byli źurja Serbskeje cerkwje w Złem Komorowje wótwórjone za wósebne tšojenje. Raz wob lěto se how wugótujo mjaztym južo tradicionelna nimsko-serbska namša. Tenraz jo to była 16. a rownocasnje 5. ekumeniska namša. Pśepšosyli su na nju źěłowa kupka Serbska namša a ewangelska kaž teke katolska wósada Zły Komorow. Pśichwatało jo wušej 60 luźi z města samego a wokoliny, z Chóśebuza, Gołbina, Žylowa, Barlinja a hynźi. Něgajšny złykomorojski faraŕ Manfred Schwarz, něnto na wuměńku, jo projekt wjele lět pódpěrował. Wón jo tenraz teke pśewzeł liturgiju w serbskej rěcy. Epistel a ewangelium jo lazowała zagronita za serbske nastupnosći wokrejsa Górne Błota-Łužyca Hanka Rjelcyna.