Z Baršća/Forst. Lětosa stej źěłowa kupka Łužyska muzejowa krajina a wokrejs Sprjewja-Nysa do Nosydłojc (Noßdorf) w Baršću, na terenje starego wódowego młyna pśepšosyłej na medijowe snědanje, aby program mjaztym 21. Muzejowych nocow pśedstajiłej. Wobdane wót zelenych bomow a krickow, kótarež su chłodk pśeśiwo górcośe pósćili, jo se jadnab 40 muzejownikow a medijowych zastupnikow pśinamakało. Pó póstrownych słowach krajnego raźca Harald Altekrüger jo Günter Mattern ako cłonk Spěchowańskego towaristwa nosydłojskego wódowego młyna z.t. póbitowanja a statkowanja towaristwa pśedstajił. Pótom jo koordinator Łužyskeje muzejoweje krajiny Sven Vogt krotki pśeglěd wó programje muzejowych nocow dał, kótarež se lětosa wótměju na kóńcach tyźenjow wót 30. awgusta do 28. septembra. Pód motom „Łužyske tradicije“ organizěruju se wobźělujuce muzeje, domowniske śpy a towaristwa, kótarež wótwarduju historiske objekty, nagromadu 31 zarědowanjow, 18 wót nich jo ga wósebnje za źiśi pśedwiźonych. Sven Vogt jo mimo togo nowum pśedstajił.