Ze Žylowa/Sielow. W žylojskej „Starej lodce“ jo pśedsedaŕstwo Domowinskeje župy Dolna Łužyca zajźony stwórtk swójo slědne pósejźenje pśed lěśojskeju pśestawku pśewjadło. Dobra powěsć jo pśišła z pomnikoweje pśirady města Chóśebuza. Tam planuju stawne městno za Domowinu zarědowaś. Ako zastupnika za toś ten cestnoamtski gremium jo župne pśedsedaŕstwo jadnogłosnje wobzamknuło, wupósłaś historikarja dr. Pětša Šurmana, kótaryž jo južo wjele lět teke w pomnikowem wuběrku Maćice Serbskeje statkował. Pótom su cłonki temy zběrali za lětosnu wuměnu z prezidiumom Domowiny w nazymje.