Z Strjažowa/Striesow. Wótměnjate wótpołdnjo su planowali srjodu tyźeń, 2. julija, wótkubłaŕki źiśownje „Vier Jahreszeiten/Styri lětne case“ a hortnaŕki za Witaj-źiśi prědnych rědownjow zakładneje šule Brjazyna/Briesen. Južo z dwójorěcnymi pśepšosenjami su wubuźili narskosć k temje wognjowa wobora.

Sobu wobźělony pśi planowanju jo mjazy drugim był Rěcny centrum WITAJ Chóśebuz. Sobuźěłaśeŕka Gunda Heyderowa jo rozpšawiła: „Źěłamy z wobyma, ze strjažojskeju źiśownju a brjazyńskim hortom, pśez cełe lěto wusko zgromaźe a smy pśi wuźěłanju materialijow pomagali. Projekt wognjoweje wobory jo był jano jaden wjerašk wót wjele projektow we tom lěśe.“