Wót 22. měrca su se wótměli we słowjeńskej stolicy Ljubljana Korutańske kulturne dny z kradu wjelikeju licbu rozdźělnych zarědowanjow a tšojenjow: wustajeńce, koncerty, cytanja, źiwadłowe a kabaretne pśedstajenja, zjawne rozgrona, pśednoski a hyšći druge. Sobu nejwěcej luźi jo pśišło na wótwórjenje noweje wustajeńce „Skozi čas/Pśez cas“ znatego protagonista Korutańskich Słowjeńcow, architekta, wuměłca a pśijaśela Serbow, Karla Vouka, kótaruž jo wótwórił samo wjelikopósłańc Awstriskeje we Słowjeńskej, dr. Konrad Bühler. Wón jo někotare sady gronił we słowjeńšćinje, ale pón dalej nimski powědał, pódobnje kaž se to ma pśi zarědowanjach we Serbach. Karl Vouk wjelgin rad rozkładujo, a to jo wěsće teke pśi tej góźbje cynił, až maju Serby a Słowjeńce zgromadnosć, a to jo dual w rěcoma. How musym ned pśispomnjeś, až jo taka gramatiska zgromadnosć teke supinum. Póglědajomy-li nawłos, namakajomy cełu kopicu paralelow mjazy Serbami a Korutańskimi Słowjeńcami.