Kaki rědny wobraz to jo, gaž wiźimy we wšych jsach w serbskej Łužycy te majske bomy, tu wupyšnjonu maju. Smy južo něnto wjelgin narske, kótare bomy budu lětosa we wuběźowanju wó nejrědnjejšy majski bom, ako wugótujotej teke lětosa zasej Domowinska župa Dolna Łužyca a redakcija Nowego Casnika, te dobyśarje.

Teke w Górnej Łužycy grajo majski bom wjeliku rolu. Tam pak jo ten swěźeń kołowokoło njogo tšochu hynakšy. Gaž w Dolnej Łužycy swěśimy to stajanje boma, jo tam to swěśenje wjelike, gaž se ten bom zasej chyta (na nimski jo to „Maibaumwerfen“). To jo se južo stało w młogich jsach a dalšne take swěźenje tam budu we jsach blisko Kamjeńca, Budyšyna a Wórjejc. Mjazy drugim tam młodostne w serbskich drastwach kołowokoło boma rejuju, a ten, kenž wótryjo tu špicu brjaze, gaž ten bom padnjo, jo ten majski kral.