Z Města/Cottbus. Z tradicionelneje, rituelneje kreslanki do pěska su prawobydlarje w centralnej Awstralskej kóńc 1970tych lět wuwijali „dot-painting“ – wuměłstwo, ako cesto we wjelikem formaśe z acryloweju barwu a z dypkami, kenž z kijaškom se móluju, samsku symbolisku rěc wótbłyšćuju ako spócetne pěskowe kreslanki. Ale wetom až se pěskowe wobraze w ramiku rituelnego jadnanja „rozrejuju“, se znicuju, aby mógała se magija rosćenja do pśirody rozwijaś, su dot-painting-wobraze wobstawne twóŕby, kótarež mógu se na dobro zgromaźeństwa pśedawaś. Wót takich wobrazow jo se Christina Grecojc inspirěrowaś dała a nowu nałožowańsku wašnju techniki pyšnjenja jajow z wóskom wuwiła. Wuslědki daju se wobźiwowaś hyšći až do 21. septembra we wósebnej wustajeńcy w Serbskem muzeju. Jo to dialogowa wustajeńca – teke dot-paintingowe wuźěła z Awstralskeje su tam wiźeś, póžyconki z priwatneje zběrki dr. Birgit Scheps-Bretschneiderowa, sobuźěłaśeŕka lipšćańskego Grassi-Muzeja za ludowědu.