Ze Slěpego/Schleife. Robustnjejša, wjeledružynowa a rezistentnjejša napśeśiwo škódnym wliwam dej wordowaś góla we rowniskem gólańskem rewěrje – to jo cil dłujkodobneje pśetwari góle, kótaruž jo póstarcył wobsejźaŕ „Forst Rohne GmbH“. Na 70 hektarach dej w pśiducych źaseś lětach na strukturach bogata měšana góla nastaś. Naraźenja za pśetwaŕ góle su se južo wuźěłali wót Statnego zawoda Sachsenforst a wokrejsnego gólnego amta Zgórjelc – wó tom jo informěrowała dr. Dietgard Eichhorst, jadnaŕka Zjadnośeństwa gólnikojskich pśedewześow Dolnošlazyńska góla na slědnem pósejźenju gmejnskeje rady w Slěpem. Wóna fachowje pśewóźujo a póraźujo gólnu pśetwaŕ. Jo pódšmarnuła, až domorodna chójca wóstanjo w rowniskej góli pregujuca družyna, pśeto jo tudskim wuměnjenjam derje pśiměrjona. Ale wěcej domorodnych listowych bomow dej se pśidaś. Teke domorodne družyny krjow a łuki ze sadowymi bomami we tom koncepśe rolu graju. Ze wšakimi napšawami ma se teke wó wěstu měru pśirodnosći staraś. Tak njedej se 43 hektarow pśestrěni teje góle na 20 lět góspodaŕski wužywaś.