Z Hažowa/Haasow. Pśi nejrědnjejšem nalětnem wjedrje jo se zgromaźiło njeźelu, 13. apryla, wokoło 70 do 80 wjelikich a małych gósći na hažojskem sańkowanišću a teke w lubosnje wupyšnjonej towarišnostnej brožni, aby zgromaźe ten mjaztym tśeśi familijowy swěźeń wokoło walkowanja swěśili.

Wót zeger 15:00 jo se swěśiło, se basliło a se wě: se bulało. Pśeto w srjejźišću jo stojało serbski nałog walkowanja – tradicionelne graśe, pśi kótaremž pyšne jatšowne jaja se kłoninu dołoj bulaju. Chtož jo nejšykownjejšy pśi bulanju – „walkowanju“ –, jo dobyśaŕ.

Ale nježli su se do togo „jajowego sporta“ dali, jo se starała kupka maśerjow z wjelerakim sortimentom tykańcow wó śělne derjeměśe – jich z lubosću wupjacone tykańce su byli to pšawe za spódobne kafejpiśe. Wót zeger 17:30 jo slědował dalšny kulinariski highlight: regionalna kuchnja z twarogom, kulkami, lanym wólejom a z wjele ku kombiněrowanju. Brožniny kjarcmaŕ jo wšo z wutšobnosću serwěrował.