Z Irskeje/Irland. Zachopjeńk apryla jo wótźělenje regionalne wuwiśe a mjeńšynowy šćit Serbskego instituta woglědało do Irskeje respektiwnje do irskorěcnych stronow (Gaeltachtaí) wokoło Galwayja ako teke Dublina. Ekskursije k europskim mjeńšynam su wažny zakład za pśirownujuce slěźenje a słuže tomu, wót mjazynarodnych nazgónjenjow wuknuś. Mały wurězk z drogowańskeje rozpšawy cytaśo how.

Team jo drogował na zelenu kupu z wjele slěźeńskimi pšašanjami k rěcnej a kulturnej politice. Prědny cel: „Údarás na Gaeltachta“. „Głowna nastupnosć toś teje statneje agentury jo, zawěsćiś irsku rěc ako powědanu rěc w gmejnach“, wujasnjujo Tomás Ó Síocháin, Príomhfheidhmeannach/CEO of Údarás na Gaeltachta. „Wóna pódpěrujo wejsne gmejny a pśedewześa, region wuwijaś a rěc a kulturne derbstwo zdźaržaś.“