Wjele se pišo a wó tom powěda, až budu wobydlaŕki a wobydlarje w Nimskej pśecej starše a až licba luźi, ako su na wuměńku, dalej rosćo. To wšykno wiźimy teke w Dolnej Łužycy a to płaśi rowno tak za serbskich luźi.

We wokrejsu Sprjewja-Nysa to na pśikład we wšakich amtach a městach tak wuglědajo (licby su wót kóńca lěta 2023):

W Bórkojskem amśe jo było wót dogromady 9.100 luźi jadnab 2.450 starše ako 65 lět (27%). W lěśe 2015 jo jich było „jano“ 1.970. Tak jo jich późěl rosł wó wušej 24%.

W Drjowku a pśisłušajucych jsach su 2023 licyli jadnab 5.530 wobydlarjow a wót nich běšo pśisamem 1.500 zešwyrnuło 65. žywjeńske lěto (27%). W lěśe 2015 běšo jich 1.250 wósobow, a tak jo se to pówušyło wó 19%.

We wjelikej gmejnje Gołkojce, ku kótarejž słuša 18 jsow, jo bydliło na kóńcu lěta 2023 9.380 luźi. Mjazy nimi jo było jadnab 2.250 žeńskich a muskich, ako su byli starše ako 65 lět (27,2%). W lěśe 2015 jo było jich 2.070 wósobow, a tak jo se to pówušyło wó pśisamem 23%.

A w picańskem amśe wuglědajo to tak: tam jo bydliło 2023 10.640 luźi, a wót nich jo było pśisamem 3.000 wušej 65 lět (28,10%). W lěśe 2015 jo jich było w rentnaŕskem casu jano 2.400, a tak jo se to pówušyło wó 24%.