Skóro wšuźi, źož se informěrujo wó serbskem luźe, wózjawijotej se znatej licbje 20.000 Dolnoserbow a 40.000 Górnoserbow. Až to njejsu realistiske licby, kužde wě. Wóni daniž nic wó tom njewugroniju, kak wjele luźi powěda serbskej rěcy, daniž kak wjele luźi se wuznawa ako Serby, ale rěc jano źělnje abo zewšym njepowěda.

Z wida dolnoserbskeje rěcy stej se z toś teju problematiku zaběrałej Sabine Asmus a Till Wojtow z Instituta za sorabistiku na Lipšćańskej uniwersiśe w swójom wědomnostnem nastawku pód titlom „Kak wjele kompetentnych powědarjow dolnoserbšćiny jo w lěśe 2024? Pówoblicenje na zakłaźe aktualnych datow“, kótarež stej wózjawiłej w rěcywědnem casopisu Slavia Occidentalis Uniwersity Adama Mickiewicza w Poznanju. Wótegrono na pšašanje jo w toś tom nastawku: Jano 50 do 100 wósobow powěda dolnoserbšćinu kompetentnje, rozmjej na wjelgin wusokem niwowje.