Z Baršća/Forst. Něco wjelgin źiwnego jo se stało na slědnem pósejźenju wokrejsnego sejma Sprjewja-Nysa (SPN) 2. apryla we Wokrejsnem domje w Baršću. Daniel Keller (SPD), nowy bramborski ministaŕ za góspodaŕstwo, źěło, energiju a šćitanje klimy, jo pśed wótpósłańcami a gósćimi powědał wó tom, kak kśě wětše a mjeńše firmy a rucnikarjow w Dolnej Łužycy lěpjej spěchowaś a špatnu situaciju pśewinuś a wótpóraś. Mjazy drugim jo teke pomjenił janšojsku milinaŕnju, w kótarejž co LEAG pózdźej raz zelenu elektrisku energiju producěrowaś, wósebnje z płunom (Gas). We tom zwisku jo wobtwarźił, až nowe kněžaŕstwo wót SPD a BSW jo za to, až buźo se až do lěta 2038 we Łužycy wugel wudobyś a „spaliś“ za energiju. Zgónili su pśibytne wót ministarja teke to, kak se procuju, aby głažkaŕnja w Drjowku mógała dalej źěłaś – snaź z drugeju produkciju – a kak by mógała wjelika fabrika w Cersku/Tschernitz pla Derbnja/Döbern dalej producěrowaś solarny głažk. Wóna ga jo ta jadnučka fabrika w cełej Europje, ako taki specielny głažk naźěłajo.