Z Města/Cottbus. Někak 20 zajmcow jo pśišło slědnu wałtoru do kulturneje rumnosći Eck 51 w Chóśebuzu na cytański wjacor. Serbski pěsnjaŕ Bernd Pittkunings jo pśedstajił někotare swójich kolumnow, tu prědnu w serbskej a wše dalšne w nimskej rěcy. Te pišo pód titelom „Tak ja to wiźim“ wót lěta 2018 raz wob mjasec za serbski program rbb. Dnja 8. apryla su měli swóju premjeru w nimskej rěcy.

Wulicował jo Pittkunings, až planujo Ludowe nakładnistwo Domowina wudaś jogo teksty w kniglickach, na tom rowno źěła. „Kolumna“ – to jo krotka žurnalistiska forma, w kótarejž groni respektiwnje pišo awtor swójo měnjenje k aktualnym zjawam a politiskim tšojenjam. A wóna pśiźo w pšawidłownem rytmusu, pak w śišćanych medijach, w radiju abo telewiziji abo w drugich medijach w interneśe. Kolumna jo wósebna forma komentara, awtor móžo ale teke snadnu satiru zaźěłaś. Bernd Pittkunings se rozestaja z politiku rowno tak ako ze zjawami towarišnostnego abo góspodaŕskego žywjenja. Spódobało jo se publikumoju literarnego wjacora teke, až jo pó pśestawce spiwał pěsni a jo k tomu grał na gitarje.