Wót zachopka apryla jo Serbski muzej Chóśebuz dostał spěchowane wót Załožby za Serbski lud městno za zwězkowu słužbu dobrowólnych (BFD). Na tu słužbu jo zastupił naš něgajšny sobuźěłaśeŕ Olko Derepasko. Wón jo staśan Nižozemskeje, jo kulturu (kulturnu wědu) w Ukrainje studěrował a jo pśed pěś lětami śěgnuł do Łužyce. Olko jo južo źěłał na wjele dolnoserbskich institucijach. Z pór pšašanjami jo se Jill-F. Ketlicojc na njogo wobrośiła.

Wótkul pśiźo twój zajm za dolnoserbsku rěc? Kak jo twója droga do swěta Dolnych Serbow wjadła?

Olko: Ja som wót źiśetstwa měł zajm za rěcy. Som teke pytał informaciju wó serbskima rěcoma kótarejež jo dało tegdy pśemało. A stojaca mě k dispoziciji njejo była aktualna. Som był fasciněrowany wót „Krabata“ a serbskeje mytologije. A pózdźej su mě wjelgin pógnuli chrósćańske demonstracije. Wót togo casa som pytał móžnosći serbski wuknuś, wósebnje dolnoserbsku rěc, dokulaž som zgónił, až jo kritiski wobgrozona.