Z Wjerbna/Werben. Wuknice a wukniki zakładneje a wušeje šule „Mina Witkojc“ w Bórkowach su pósporomje sćažki za kólasowarjow mjazy Bórkowami a Wjerbnom sadowe bomy sajźili. Ideja k tomu jo pśišła wót młodostnych samych.

We chemijowej wucbje z ceptaŕku Hannelore Huthoweju su wóni wobjadnali temu klimoweje změny z wustarcenim CO2. Z togo jo wujšło žycenje, z akciju sajźenja bomow klimowej změnje cele praktiski něco znapśeśiwiś.

Pśez twaŕnistwo (Bauhof) bórkojskego amta jo se nawězał kontakt k šołśe gmejny Wjerbno, z Danielom Troppu. Ten jo se wjelgin wjaselił angažementoju młodostnych: „My dejali te mjaztym wótemrěte sadowe bomy, kótarež su se sajźili gromaźe ze zapołoženim sćažki za kólasowarjow pśed 30 lětami, zarownaś“, jo měnił Daniel Troppa. „Gmejnske zastupnistwo jo se zasej za sadowe bomy rozsuźiło, tak až te, kótarež pón z kólasom mimo jědu, směju se raźi pósłužowaś.“