Z Dešna/Dissen. Krotko a słodko su cłonki nowego župnego pśedsedaŕstwa swójo pósejźenje zajźony stwórtk na dwórje „Sprjewiny ług“ w Dešnje pśewjadli. Gósćinaŕ Fred Kaiser jo cłonkam župnego pśedsedaŕstwa krotko projekt pód titlom „serbska wjas 2030“ pśedstajił, w kótaremž gmejna planujo twarjenje na dwórje „Sprjewiny ług“ pśetwariś a etablěrowaś ako rěcny centrum za Zorja. Cłonki gremiuma jo wón pšosył wó pódpěru pśi toś tom „mamutowem“ projekśe.

Pótom jo zastupny župan Marcus Kóńcaŕ pšosył cłonkow wó wugódnośenje głowneje zgromaźiny župy, dnja 28. februara, w Žylowje. Mjazy drugim su diskutěrowali wó terminje a naraźili su pśewjasć interaktiwne diskusijne koła w małych kupkach pó pśikłaźe głowneje zgromaźiny zwězkoweje Domowiny. Nawězali su teke na tu diskusiju, kótaruž su wjadli južo pśed styri lětami, ga wó tom, lěc by dejała župa Dolna Łužyca mě wuznamneje dolnoserbskeje wósoby nosyś, ako druge Domowinske župy. To by pak było diskusijna tema za głownu zgromaźinu.