Z Wulkich Zdźarow/Groß Särchen. Pód nadpismom „Domoj“ jo se zachopił zajźonu wałtoru, 8. apryla, w ramiku projekta „Zari“ (seś za serbsku rěc a regionalnu identitu) źewjeś mjasecow trajucy intensiwny kurs za górnoserbšćinu. Pódobnje dolnoserbskego projekta „Zorja“ w Dešnje deje wobźělniki w šćitanem „rěcnem gnězdźe“ w relatiwnje krotkem casu serbsku rěc nawuknuś. Na styrich dnjach co jadnasćo wobźělnikow pó wšakich wašnjach a metodach w bogatej licbje rěc nawuknuś. Jaden z głownych zagronitych za projekt jo wjednik rěcnego kubłanja w projekśe „Zari“ Julian Nyča. Wón jo pśeznanjony, až wukubłaju se z nowym projektom „sebjewědobne nowopowědarje, kótarež budu se malsnje a efektiwnje do serbskeje zjawnosći a zgromadnosći integrěrowaś“. Kurs se wótmějo na nowem Krabatowem wudwórje w Nowych Zdźarach (Neusärchen). Tam najmjejo „Zari“ brožnju byśa.