Z Budyšyna/Bautzen. Pětk, 11. apryla, jo se nowe Zwězkowe pśedsedaŕstwo (ZP) Domowiny oficialnje skonstituěrowało a jo něnto do źěła zamóžne. Jo to zachopk noweje legislaturneje periody až do 2029. Fokus jo lažał na mjazsobnem zeznaśu a strategiskem wusměrjenju. Moderator pósejźenja jo był pśedsedaŕ Dawid Statnik, kogož jo sobotu pśed tym głowna zgromaźina Domowiny wuzwóliła. Na pósejźenju w Serbskem domje w Budyšynje kaž teke digitalnje jo se wobźěliło 23 cłonkow.

Někotare su se wó tom wugronili, kak se pśedstajiju źěłabnosć togo gremiuma. Žycenje dr. Hartmuta Leipnera jo na pśikład, nic jano na górnoserbšćinu ze zepěraś, ale teke dolnoserbšćinu wužywaś. Alena Hiccyna pórucujo dalšne zgromadne źěło mjazy kubłańskeju referentku Domowiny a Serbskim šulskim towaristwom. Na pšašanje Jana Ryćerja, lěc ma Domowina pšawiznika, jo zdźěliła jadnaŕka Judit Šołćina, až źěła kšywowy zwězk pó pótrjebje z eksternymi póraźowarjami.