Z Bórkow/Burg. Dnja 20. měrca 2025 jo se wótnowotki wótměł inspirěrujucy workshop pód mójim nawjedowanim ako póraźowaŕka prakse Serbskego šulskego towaristwa z.t. (SŠT) za wótkubłarjow a wótkubłaŕki we Witaj-kupkach. Wšykno jo se wjerśeło ten raz wokoło wjelebocneje temy „kulki“.

Ja som pśišła ze swójim „work-shop-koferom“, kenž jo był z „wjelimi pórucenjami“ połnjony, do Bórkojskego šulskego horta „Lipa“. Južo dłujkolětna kooperacija wobstoj mjazy mnu a wjednicu Iva Schultchenowa. Som wob lěto někotare raze na tom městnje, ale organizěrujom teke w klubowni internata Dolnoserbskego gymnaziuma workshopy z drugimi kooperaciskimi partnarjami (na pśikład z Dolnoserbskeju kulturneju akademiju) a pśewjeźom teke sama źěłaŕnicki. How dawam wobźělnicam a wobźělnikam k wěstej temje wjele póstarkow. Wšykne pórucenja su tak naźěłane, až wobpśimuju wšykne wobłuki kubłanja. Serbska rěc a zwucowanja za wokable stoje w srjejźišću, a rum za kreatiwnosć a wuměnjenje wóstanjo na kuždy pad teke.