Z Cazowa/Zahsow. Rowno te wjelgin małe jsy, kótarež to zwónoźiju, kužde lěto zapust na nogi stajiś a słušnje swěśiś, zasłužyju se pśipóznaśe. K nim słuša teke Cazow. Wjas z nic razka 300 dušami jo 8. měrca, pótakem na dnju žeńskich, swój lětosny a mjaztym 18. zapust swěśiła. Kšasne nalětne słyńco, móžoš groniś, jo sobu swěśiło. Pódla zgromadnego wejsańskego doma su stajili swěśeński stan, w kótaremž su se zapustaŕki a zapustarje wokoło zeger dweju zmakali a tam se z tykańcom a kafejom za pśeśěg zmócniś mógali. Chłošćonki su za nich pśigótowali cłonki wejsnego swěźeńskego komiteja, w kótarychž rukach teke w cełku lažy organizacija wejsańskich wjeraškow kaž camprowanja (lětosa 22. februara) a se wě zapusta. Cłonki togo komiteja su mjazy 18 a 60 lět stare, a pla wobźělnikow a wobźělnicow pśeśěga jadna se wó pódobnu starstwowu měšańcu. Teke źiśece póry wóni how cesto maju. Lětosa jo mjazy dogromady 12 pórami wšak jano jaden źiśecy pórik pódla był.