Z Budyšyna/Bautzen. Na głownu zgromaźinu jo Zwězk za serbski kulturny turizm z.t. (SKT) swójich cłonkow srjodu, 12. měrca, do zala w Röhrscheidtowej bastaji pśepšosył. Ned na zachopjeńku zarědowanja jo měł projektowy manager Franc Golchert za pśibytnych zwjaselecu powěsć: Towaristwo ma wót łońskego lěta noweju cłonkowu. Z tym se pówušyjo cełkowna licba cłonkow na 41. Nowacka we zwězku stej towaristwo „Małowjelkojska sotšownja“ a mały turistiski portal „Lausitzerleben.de“.

Sobuzałožaŕka portala, Drježdźanaŕka Dagmar Bilke, jo se prědny raz na pósejźenju SKT wobźěliła a ned swój projekt pśibytnym pśedstajiła. Gromaźe ze swójim synom jo znaglědniła turistam z tekstami a krotkofilmami jadnoraznosć Łužyce na pólu kultury, pśirody kaž teke stawiznow. Glědajucy na serbsku rěc a kulturu kaž teke słowjańske stawizny regiona naźeja se Dagmar Bilke na fachowe póraźowanje ekspertow SKT, kótarež dej dalej k dobrej a lěpšej kwaliśe wopśimjeśow na portalu pśinosowaś.