Z Města/Cottbus. Wałtoru, 11. měrca, jo Serbski ludowy ansambel (SLA) pšosył do klubownje Serbskego doma w Chóśebuzu na mału rozgranjańsku rundu, źož jo se měła wugódnośiś lětosna wjacorna a źiśeca ptaškowa swajźba. Take wugódnośenje jo tradicionelnje pśecej dało pó ptaškowej swajźbje SLA, ale w slědnych lětach jo to wusnuło. Lětosa jo se to zasej wóžywiło.

Na zmakanju su se wobźělili intendant SLA Tomaš Kreibich-Nawka, za Dolnu Łužycu zagronita sobuźěłaśeŕka Jana Krügerowa kaž teke zastupniki wšakich serbskich institucijow, ga wót Załožby za serbski lud, Rěcnego centruma WITAJ, Domowiny a Serbskego instituta, mimo togo te zagronite za serbske nastupnosći wokrejsa Dubja-Błota (LDS), Sprjewja-Nysa (SPN) a Górne Błota-Łužyca (OSL) kaž teke kulturnopolitiski zagronity wót bramborskeje Serbskeje rady Michael Apel a praksowa póraźowaŕka Serbskego šulskego towaristwa Mila Zachariasowa.