Z Hochoze/Drachhausen. Na serbske wótpołdnjo jo kazała Šula za dolnoserbsku rěc a kulturu slědnu sobotu. Južo ako su pśijěli pśi hochoskej kjarcmje, su gósći słyšali dujaŕsku muziku. „Kake wuwitanje“, su se myslili, z wokom zmyrkajuce. Ako su bližej stupili, su wěźeli, až tomu napšawdu tak jo. Na naměstnje za cerkwju su rejowali młode źowća w serbskej drastwje, pśewóźowane wót młodych dujaŕskich gercow. Wóni su zwucowali a pózdźej teke w zalu swój program pokazali.

Dypkownje zeger dweju jo wuwitała wjednica Šule za dolnoserbsku rěc a kulturu Uta Henšelowa zgromadnje ze zastupnym šołtu Hochoze Helge Becker gósći na južo tradicionelne serbske wótpołdnjo.

Zal jo był połny, 120 luźi – gósći a sobustatkujuce – su sejźeli za wupyšnjonymi blidami. Pśi kafeju a burskem tykańcu su mógali póžywaś chłošćonki serbskeje a ukrainskeje kultury: spiwy, reje a teke kjarliže.