Z Města/Cottbus. Pód toś tym motom jo se wótměł pónjeźele wótpołdnja we našom wósadnem centrumje bibliske koło, ako organizěrujo Spěchowańske towaristwo za serbsku rěc we cerkwi z.t. De facto nawjedujo to Hartmut Leipner a pónjeźele jo to wušej togo było za njogo jadno pśespytowańske zarědowanje, dokulaž ga H. Leipner rowno absolwěrujo cerkwine dalejkubłanje na predikanta. Tema rozgrona jo było zmakanje Mojzasa z Bogom (2. Mojzas 3, 1-9), to jo městno w bibliji, źož Bog ten Kněz powěda z Mójzasom ze se palecego kerja a Mojzasoju dajo nadawk, Israelski lud wjasć z Egyptojskeje do zlubjonego kraja. Ako zawód jo cytała Madlena Norberg Bóže słowo, kótarež jo měła we februarje ku toś tomu bibliskemu městnoju. Pótom jo pśewzeł H. Leipner a jo nam na wuběrnu wašnju rozkładł, chto Mojzas jo był, źo jo bydlił, co jo se w jogo žywjenju tšojł a druge. Na wjelgin pedagogisku wašnju jo swóju eksegezu natwarił, tak až kuždy jo něco nawuknuł. Wužywał jo teke wobraze, kórtu, krotke filmowe sekwence a samo hebrejsku rěc. Teke serbsku rěcnu analyzu smy wót bibliskego teksta wótwóźowali.