Z Lubina/Lübben. „Z wiziju do pśichoda“ – pód toś tym motom jo kšywowy zwězk Domowina pśepšosył zachadny stwórtk do lubinskego groda gósći ze zwězkoweje, krajneje a komunalneje politiki, z towarišnosći a z towaristwowego žywjenja. Jadnab 100 luźi jo tomu slědowało, aby pó słowach pśedsedarja Dawida Statnika pśišło do rozgrona wó tom, až buźo w lěśe 2100 zasej 100.000 serbski powědajucych luźi. Wósebnje za toś cel jo wjele partnarjow z wšakich rowninow politiki a wjele projektow trjebnych.

Zachopk a kulturny program jo błośański žeńskecy chor Lubin pśewzeł, jadnotliwe spiwy jo tśirěcnje pśednosował. Slědował jo krajny raźc wokrejsa Dubja-Błota Sven Herzberger, kenž jo se Domowinje źěkował za iluminaciju historiskego groda zwenka a jo wuzwignuł, až rěc jo to nejwažnjejše. Bźez njeje njedajo žedneje kultury. Na zastupnikow ze Sakskeje a Bramborskeje jo apelěrował, aby rěc spěchowali, wósebnje to wukubłanje ceptarjow.