W Njabožkojcach (Naundorf) , we hyšći wjelgin młodej „Michelberger Farm“, wótnožce barlinskego hotela samskego mjenja, jo stwórtk tyźeń se wótměł pśed domorodnym a zajmowanym publikumom prezentacija nowego kalendarja „Serbska Pratyja 2025“. Zawina, až jo se to stało w Njabožkojcach, jo se wě była ta, až toś ten měsćański źěl Wětošowa, ku kótaremuž teke susedna wjas Długi (Fleißdorf) słuša, stoj tenraz w srjejźišću togo wudaśa za 2025.

Pśed něźi 20 gósćimi jo pśedstajił redaktorski team – Ingrid Hustetowa ako zagronita za źiśecu Pratyju, Martina Golašojc ako zagronita za cerkwinsku rubriku a lektorka Janka Pěčkojc de Lévano – tu dwójorěcnu publikaciju (jo, nimski późěl jo tenraz bujny), lektorka Janka Pěčkojc de Lévano jo zarědowanje moderěrowała. Na pšašanje wót njeje, wjele tych pśisłuchaŕkow a pśisłucharjow serbsku rěc wuměju, su nanejmjenjej styrjo se ku tomu wuznali. Thomas Paulick, prědkstojaŕ teje błośańskeje gmejny, jo to zarědowanje wótwórił.