Z Brjazyny/Briesen. Zachadny pětk jo mań luźi – źiśi, starjejše, stare starjejše, sotšy, bratšy a něgajšne wuknice a wukniki – do brjazyńskeje zakładneje šule Mato Kosyk pśichwatała, aby gromaźe z wuknicami a wuknikami a jich ceptaŕkami a ceptarjami 70. jubilej teje šule w ramiku wjelikego swěźenja swěśili. Ned pśed źurjami stej wuknica a młoda ceptaŕka serbske woblaconej gósći z klěbom a solu wuwitałej. Pó rědnje wupyšnjonych wjažach šule, mjazy drugim z toflu z informacijami wó žywjenju a statkowanju Mata Kosyka, su wjadli cesne gósći do awle, źož su pyšny program za nich pśigótowali.

Pó krotkem wuwitanju jo wjednica šule Kerstin Linkowa to słowo źiśam pśepódała. Wuknica a wuknik stej w dwójorěcnej moderaciji swěźeński program pśedstajiłej, w kótaremž su wuknice a wukniki rejowali a spiwali a, se wě, baseń Mata Kosyka „Gólc z Błota“ (Ein Spreewaldjunge) nimski a serbski recitěrowali. Pótom jo wjednica šule hyšći wó wótměnjatej historiji šule powědała a direktor Bórkojskego amta, Tobias Hentschel, jo pó swójom nagronje wuknikam dary pśepódał.