Z Hajnka/Hähnchen. 47,9 milionow euro jo płaśiło twarjenje cełkowneje šule z gymnazialnym wušym schójźenkom w Gołkojcach. Až do togo jo to nejwětša jadnotliwa inwesticija wokrejsa Sprjewja-Nysa! Ale źo su pjenjeze lěpjej inwestěrowane, ako w kubłanju młodych luźi? Za załoženje cełkowneje šule jo iniciatiwa starjejšych wjele lět wójowała. Jo to była kamjenjata droga, kenž jo dołoj a górjej wjadła, ale ako jo Ministaŕstwo za kubłanje, młoźinu a šport šulu w aprylu 2019 to pśizwóliło, su wšykne wobuznosći zabyte byli. Slědowali su dwě lěśe planowanja a pótom hyšći tśi lěta twarjenja.

Prědne wuknice a prědnych wuknikow su mógli južo ze zachopjeńkom šulskego lěta 2022/2023 pśiwześ. Jich su pak w rumnosćach centruma wušego schójźenka II w Chóśebuzu, na droze Makarenka, wuwucyli. W juliju 2024 su skóńcnje do nowego šulskego chroma w Gołkojcach pśeśěgnuli.