Z Janšojc/Jänschwalde. Pěś gólcow z młoźiny a tśo z Radowize su how lětosa rejtowali. Wóni su se pśi sportnišću zmakali a pón na swěśenišćo wujěchowali. Tam su byli pśigótowane wrota a stojnice za tykańc, pjaconu jěšnicku a piśa. Aschendorf-Richterojc familija z Janšojc jo sponsor kokota. Pśi górucem wjedrje su „Lutzketaler Musikanten“ radnje zatopili, a tych styrnasćo źowćow jo sobu spiwało a rejowało, to su njeglědajucy na górcotu zmejstrowali. Teke kónje wót Wjelanojc kónjecego dwóra a rejtarje su pitśu pód temperaturami śerpjeli, a młoge njejsu w zaskoku pśirejtowali. Pó dwěma góźinoma jo janšojski młoźinski šef Noah Rex, kenž jo pśed tym južo někotare dobre šanse měł, głowku kokota wótrył. Lěbda góźinu a dwa pada rejtarjowu pózdźej jo Radowizaŕ Leon Pursche na kobyle Uschi – wónej stej nastajony pórik – drugi kral był. Jusk źowćow a pśiglědowarjow njejo hyšći dozněł, ako Tamino Krokor (teke z Radowize) jo druge kśidło wótrył. Za njogo jo to prědne łapanje kokota ako wobźělnik było, rowno tak za Timona Kretschmera.