Z Dešna/Dissen. Bóśonowa wjas njejo jano na slědnem kóńcu awgusta wjeliki drastwiny a domowniski swěźeń dožywiła, ale teke kokotowy jubilej. Ceły žnjowny nałog jo se zachopił z wjelikim pśeśěgom pó jsy. Dešańska młoźina a teke starše, nazgónite wobźělniki a wobźělnice su w pśeśěgu sobu chójźili a se prezentěrowali. Ale někotare su teke pśi drugich wěcach sobu źěłali abo ceło hynakše nadawki měli, ako na pśikład moderěrowaś. Źowća a žeńske dešańskeje młoźiny a nazgónite su ako źasety motiw z kapału nAund sobu chójźili a slězy nich su gólcy na swójich kónjach rejtowali. Ako su sportnišćo dojśpili, su nazgónite muske juž chopili se zarejtowaś a źowća su se na jawišću zgromaźili. Ako su wšykne skóńcnje swóje městna zabrali, jo dešańska młoźina publikum wuwitała a to – se wě – ako prědne w dolnoserbskej a pón w nimskej rěcy, a jo teke rejtarjow a źowća pśedstajiła. Gaž jo kokot na wrotach wisał, su se nazgónite rejtarje do wuběźowanja dali. Wóni su młodym pokazali, kak łapanje kokota pšawje funkcioněrujo, dokulaž njejo dłujko trało, až jo prědny kral jasny był.