Z Miłoćic/Miltitz. Pětk a sobotu, 26. a 27. julija, jo Witaj-festiwal swóju premjeru pśi Miłoćańskej skale (Steinbruch Miltitz) swěśił. Toś ten festiwal jo Daniel Häfner, Plon GmbH, z pomocu Jakuba Čornaka, alias Jacke Schwarz, a Tomaša Čornaka, zapósłańca Serbskego sejma, ze spěchowanim Załožby za serbski lud organizěrował – ako serbske městno za zmakanja a wuměny mjazy Górneju a Dolneju Łužycu a rowno tak mjazy młodeju a stareju generaciju Serbow. Mimo togo jo cil organizatorow, prozny flak serbskich pórucenjow a zarědowanjow mimo folklorizma, za luźi we starstwje mjazy 18 a 50 lětami, wupołniś. Až prědny wopyt jo wuspěch był, pokažo licba wót 300 do 400 woglědarjow na dwěma dnjoma festiwala. Rowno dla togo planujo Daniel Häfner nanejmjenjej wob cas pśiducych pěś lět, Witaj-festiwal dalej wuwijaś. Južo za prědnu rundu su wón a Jakub a Tomaš Čornak pyšny strus kulturnych pórucenjow na pólu muziki, filma a rucnego źěła wuwězali.