Kóńc zajźonego lěta jo Spěchowańske towaristwo za serbsku rěc w cerkwi z.t. wudało nowe knigły w tśich rěcach „Ze źiśimi se módliś – Mit Kindern beten – Modlitwy dla dźieci“. Poł lěta jo zajšło a dalšne cytarje su nam pósrědnili swóje měnjenja a nazgónjenja:

Dr. Timo Meškank, Lipsk, 5.3.24: „Knigły ,Ze źiśimi se módliš‘ wopśimjeju 44 krotkich módlenjow w tśich rěcach. Wóni su šesć wótrězkam pśirědowane a segaju wót familije pśez wótběg dnja až k žywjenju góleśa. Módlitwy su myslone za priwatny wobłuk, w kótaremž mógali źiśi mjazy 6 a 14 lětami sami abo z pomocu swójźbnych rozgrono z Bogom wjasć. Wótergi naiwne („Módlitwa pśed dowolom“), zwětšego pak swětoju wótwórjone („Móje narodniny“) póbituju wóni inspiraciju, swóje nutśikowne zacuśa pśednjasć a wó rozměśe póžedaś. Wóznam mamineje rěcy pśi nawězanju zwiska z Bogom znaglědnja slědna módlitwa w knigłach („Naša luba mamina rěc“), kótaraž intensiju awtorki Barbary Städtler-Mach (glědaj jeje pśedsłowo) wobraznje pódšmarnjo.“